Xəbər verdiyimiz kimi, Sumqayıtda "Kristal Abşeron" MTK-dan şikayət var.
Sumqayit24.az-a müraciət edən vətəndaşların sözlərinə görə, Sülh prospektində "Kristal Abşeron" tərəfindən inşa edilən yeni binalarda təmir-tikinti işləri tam yekunlaşsa da, mənzil sahiblərinə hələ də açarlar təhvil verilmir.
Sakinlərin sözlərinə görə, şirkət rəhbərliyi hər dəfə eyni bəhanəni irəli sürür.
"Kanalizasiya xətlərinin ana xəttə qoşulması prosesi gedir, gözləyin".
Sumqayit24.az-ın sorğusuna "Kristal Abşeron"un İctimaiyyətlə Əlaqələr Şöbəsindən bildirilib ki, qeyd olunan məsələ tərəfimizdən nəzarətdə saxlanılır və artıq müəyyən müddətdir ki, aidiyyəti dövlət qurumları ilə müvafiq prosedurlar çərçivəsində intensiv iş aparılmaqdadır:
"Məlumat üçün qeyd edək ki, yaşayış binalarında tikinti-quraşdırma işləri əsasən yekunlaşmış olsa da, obyektlərin istismara verilməsi və mənzillərin açarlarının təqdim olunması yalnız qanunvericiliyin tələblərinə uyğun olaraq bütün mühəndis-kommunikasiya sistemlərinin, o cümlədən kanalizasiya xətlərinin şəhərin mərkəzi (ana) sisteminə tam və rəsmi şəkildə qoşulmasından sonra mümkündür. Hazırda məhz bu istiqamətdə texniki və inzibati prosedurların tamamlanması məqsədilə aidiyyəti qurumlarla koordinasiyalı iş aparılır.
Qeyd olunan proseslərin müddəti bir sıra hallarda şirkətdən asılı olmayan səbəblərdən, o cümlədən texniki uyğunlaşdırma, layihələndirmə və dövlət qurumları ilə razılaşdırma mərhələlərinin tələblərindən irəli gələrək uzana bilər. Bununla belə, tərəfimizdən prosesin sürətləndirilməsi istiqamətində bütün zəruri tədbirlər görülmüş və işlər aktiv fazaya keçirilmişdir.
Mövcud vəziyyəti nəzərə alaraq bildiririk ki, cari ayın sonundan etibarən mənzillərin mərhələli şəkildə, qanunvericiliyin tələblərinə uyğun formada sahiblərinə təhvil verilməsinə başlanılması planlaşdırılır.
"Kristal" olaraq vurğulamaq istərdik ki, fəaliyyətimizdə əsas prioritetlərdən biri müştəri məmnuniyyəti və vətəndaşların hüquq və maraqlarının qorunmasıdır. Bu kimi məsələlərdə sakinlərimizin yanında olduğumuzu bildirir, yaranmış gecikmə ilə bağlı anlayış və səbir göstərdiklərinə görə təşəkkür edirik. Şirkət olaraq bütün öhdəliklərimizin icrasını təmin etmək istiqamətində fəaliyyətimizi davam etdiririk".
***
Sumqayıtda "Kristal Abşeron" MTK-dan şikayət var.
Sumqayit24.az-a müraciət edən vətəndaşların sözlərinə görə, Sülh prospektində "Kristal Abşeron" tərəfindən inşa edilən yeni binaların sakinləri artıq 5 aydır çıxılmaz vəziyyətdə qalıblar.
Bildirilib ki, binalarda təmir-tikinti işləri tam yekunlaşsa da, mənzil sahiblərinə hələ də açarlar təhvil verilmir. Sakinlərin sözlərinə görə, şirkət rəhbərliyi hər dəfə eyni bəhanəni irəli sürür.
"Kanalizasiya xətlərinin ana xəttə qoşulması prosesi gedir, gözləyin".
Lakin sakinlər qeyd edirlər ki, bu "gözləyin" vədi artıq yarım ildir davam edir və problem hələ də həllini tapmayıb. Onların sözlərinə görə, tikinti zamanı kanalizasiya layihəsinin əvvəlcədən planlaşdırılmaması sual doğurur.
"Bina tikilənə qədər kanalizasiya infrastrukturunun layihələndirilməsi və qoşulması niyə təmin edilməyib? 5 ay ərzində bir xətti ana sistemə qoşmaq bu qədərmi çətindir, yoxsa başqa səbəblər var?", - deyə sakinlər narazılıqlarını ifadə ediblər.
Məsələ ilə bağlı aidiyyəti quruma sorğu ünvanlanıb.
