Bu gün sumqayıtlı şəhidin doğum günüdür.
İzzət Həmidov 28 fevral 2000-ci ildə Sumqayıt şəhərində anadan olub. Sumqayıt şəhər 26 saylı orta məktəbdə təhsil alıb. Şəhidin anasının sözlərinə görə, İzzətin uşaqlıqdan böyrəyində, ayağında problem var idi deyə hərbi xidmətə yararlı deyildi və buna görə dövlət tərəfindən ona aylıq müavinət verilirdi.
"Lakin İzzət hərbi xidmətə getmək üçün həmin müavinətdən imtina etdi. Bir il hərbi komissarlığa gedib inad etdi ki, məni əsgərliyə aparın. Deyirdi ki, hərbi formanı geyinmək ən böyük arzumdur", - deyə İzzətin anası qeyd edib.
İzzət Həmidov 2020-ci il oktyabrın 9-da Füzulinin Alıxanlı kəndi istiqamətində gedən döyüşlərdə şəhidlik zirvəsinə ucalıb. Sumqayıt şəhəri, Şəhidlər Xiyabanında dəfn olunub.
Prezident İlham Əliyevin Sərəncamlarına əsasən, İzzət Həmidov ölümündən sonra "Azərbaycan bayrağı" ordeni, "Vətən uğrunda", "Füzulinin azad olunmasına görə" medalları ilə təltif edilib.
