Saray qəsəbəsinin sakinləri bir sıra çətinliklərlə üzləşiblər. Sumqayıt24 bu barədə 12 dekabr tarixində ATV News-a istinadən xəbər verir.
Qəsəbənin M.S.Ordubadi küçəsində uzun illərdir işıqlandırma sistemi quraşdırılmayıb. Həmçinin burada yalnız bir avtobus fəaliyyət göstərir, o da bir saatlıq intervalla hərəkət edir.
“Küçədə işıq dirəkləri yoxdur. Qış fəsli olduğundan hava tez qaralır, məktəblilər dərsdən gələndə məcbur qalıb qaranlıqda hərəkət edirlər. Marşrut bir saatdan bir işlədiyi üçün uşaqlarımızı dərsə vaxtında çatdıra bilmirik. Təcili yardım, taksi bura çox vaxt gəlmir”, - deyə sakinlər söyləyiblər.
Saray qəsəbə bələdiyyəsinin sədr müavini Şahlar Məhərrəmov məsələyə münasibət bildirib:
“Hal-hazırda işıqlandırmaya başlanılıb, qazıntılar gedir. İşlər həmin küçələrdə mərhələli şəkildə həyata keçirilir. Avtobusla bağlı müəyyən sıxıntımız var. 2023-cü ildə yoluna qoyulacaq”.
