Sarayda yüksəklə səslə televizora baxdığı üçün oğul anasına xəsarət yetirib.
Demokrat.az-ın məlumatına görə, hadisə bu ilin yanvarın 12-də Saray qəsəbəsində, Üzümlük yaşayış massivində yerləşən fərdi yaşayış evində baş verib. Belə ki, 1979-cu il təvəllüdlü Mahir evdə anası Xalidə (adlar şərtidir) ilə mübahisə edib.
Mübahisəyə səbəb anasının televizorda onun izləmək istəmədiyi proqrama yüksək səslə baxması olub. Oğul həmin mübahisə əsnasında anasının üzərinə hücum edib, əl, yumruq zərbələri ilə onun sifət, qulaq, baş nahiyyələrinə ardıcıl vurub.
Faktla bağlı Mahirin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
Məhkəmədə məlum olub ki, təqsirləndirilən şəxs zərərçəkənlə barışıq əldə edib. Oğlu tərəfindən şiddət görən qadın onu bağışlayıb, ona qarşı şikayətini geri götürüb.
Abşeron Rayon Məhkəməsinin hökmü ilə Cinayət Məcəlləsinin 73.2-ci maddəsinə əsasən təqsirləndirilən şəxsin barəsində olan cinayət işinə xitam verilib. O, cinayət məsuliyyətindən azad edilib.
Qeyd edək ki, Mahir əvvəllər narkotiklə bağlı cinayətə görə məhkum olunub. O, 2019-cu ildə 1 il 5 ay 28 gün azadlıqdan məhrum edilib və 2020-ci ildə vaxtından əvvəl şərti azadlığa buraxılıb. 2024-cü ildə isə yenidən eyni maddə ilə təqsirli bilinərək 2 il 5 ay 26 gün azadlığın məhdudlaşdırılması cəzası alıb.
