Bu gün Sumqayıt Dövlət Dram Teatrında yaddaqalan və uğurlu tamaşalara quruluş vermiş görkəmli rejissor Rövşən Almuradlının anım günüdür.
Rövşən Almuradlı 1954-cü il aprelin 19-u Bakı şəhərində anadan olub. M.A.Əliyev adına Azərbaycan Dövlət İncəsənət İnstitutunun Dram və kino aktyorluğu fakültəsində (1972-1976), Moskva SSRİ Mədəniyyət Nazirliyi nəzdində Təkmilləşdirmə İnstitutunun ali rejissorluq kursunda (1984-1987) təhsil alıb. Aktyor kimi Tədris Teatrında fəaliyyətə başlayıb. Moskva Dövlət Akademik Satira Teatrında təcrübə keçib. Şəki Dövlət Dram Teatrında aktyor (1976-1980), Sumqayıt Dövlət Dram Teatrında rejissor (1980-1985) kimi çalışıb.
Məlumat üçün bildirək ki, Sumqayıt Dövlət Teatrında o, 1980-1985-ci illərdə Sumqayıt Dövlət Dram Teatrında Əkrəm Əylislinin "Vəzifə" tamaşasının,1987-ci ildə N.Hikmətin "Bayramın birinci günü", 1988-ci ildə isə M.Süleymanlının "Dəyirman" əsərlərinin quruluşçu rejissoru olub.
1991-ci ildə Azərbaycan Teatr Xadimləri İttifaqının nəzdində açılan müstəqil "İstiqlal" teatrının bədii rəhbəri olub. Həmin illərdə burada tamaşalara quruluş verib, 1992-ci ildə Gəncə Dövlət Dram Teatrında, 1993-cü ildən Azərbaycan Dövlət Radio və Televiziya Verilişləri Komitəsində rejissor işləyib. 2006-cı ildə Akademik Milli Dram Teatrına quruluşçu rejissor vəzifəsinə qəbul edilib.
Rövşən Almuradlı 2 aprel 2019-cu ildə Sumqayıtda ürək tutmasından vəfat edib.
