Sumqayıtın bəzi mikrorayon və məhəllələrində, həmçinin Xəzər bağlarında, H.Z. Tağıyev, Kotec, Ceyranbatan və Saray qəsəbələrində bir neçə gündür ki, su təchizatında problemlər yaşanır.
Sakinlər xəbərdarlıq edilmədən suyun kəsildiyini və bu vəziyyətin gündəlik həyatlarını çətinləşdirdiyini bildirirlər.
Vətəndaşların sözlərinə görə, suyun olmaması səbəbindən məişət işləri, xüsusilə yemək bişirmək, təmizlik və şəxsi gigiyena sahəsində çətinliklərlə üzləşirlər. Bəzi sakinlər su ehtiyaclarını qarşılamaq üçün uzaq məsafələrə getməyə və ya əlavə xərclərlə su almağa məcbur olurlar.
Sakinlər İri Şəhərlərin Birləşmiş Su Təchizatı Xidmətinin 955 nömrəli qaynar xəttinə və Sumqayıt Şəhər Sukanal İdarəsinin əlaqə nömrələrinə dəfələrlə zəng vursalar da, cavab ala bilmədiklərini və bu vəziyyətin narahatlıq doğurduğunu bildirirlər.
Hazırda su təchizatının nə zaman bərpa olunacağı ilə bağlı rəsmi bir açıqlama verilməyib. Sakinlər məsələ ilə bağlı aidiyyəti qurumlardan operativ məlumatlandırma gözləyirlər.
