Sumqayıtda 43 yaşlı kişi bacanağına xəsarət yetirib.
Demokrat.az-ın məlumatına görə, hadisə 9-cu mikrorayonda baş verib. 1983-cü il təvəllüdlü Adnan şəxsi münasibətlər zəminində yaranan mübahisə zamanı qohumu Davudu döyüb.
Ona Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan olunub.
Adnan ifadəsində bildirib ki, bacanağının qardaşı Cəmilin onun ailəsi barədə nalayiq sözlər dediyini eşidib və bu məsələni əvvəlcə Davudla, sonra isə Cəmilin özü ilə dəqiqləşdirib. Hər ikisi bu iddianı təkzib edib.
Hadisə günü Adnan Davudla görüşərək məsələni müzakirə edib və əsəbiləşərək onun sol gözaltı nahiyəsinə yumruqla zərbə endirib. Münaqişə qısa sürüb və Davud daha sonra polisə müraciət edib.
Təqsirləndirilən şəxs əməlindən peşman olduğunu, zərərçəkmişlə barışdığını və dəymiş ziyanı ödədiyini bildirib. Davud da ifadəsində zərbənin qəfil endirildiyini təsdiqləyib.
Məhkəmə tərəflərin barışmasını və ziyanın ödənilməsini nəzərə alaraq Cinayət Məcəlləsinin 73.2-ci maddəsinə əsasən cinayət təqibinə xitam verib və Adnan məsuliyyətdən azad olunub.
