Sumqayıt şəhəri, 4-cü mikrorayonun sakinləri uzun illərdir ki, məhəllədəki şəraitsizlikdən narazıdılar.
Sumqayit24.az xəbər verir ki, vətəndaşların sözlərinə görə, dəfələrlə Mənzil kommunal istismar sahəsinə müraciət edilməsinə baxmayaraq, problemlər həll edilməyib.
"Skamyanı belə öz cibimin pulu ilə almışam. 4 ildir müraciət edirəm, deyirlər ki, material yoxdur", – deyə sakinlərdən biri bildirib.
Qeyd edilib ki, həyətdən əsas yola çıxan yer dağınıq vəziyyətdədir. Nəticədə bu da maşınların gediş-gəlişində problemlərin yaranmasına səbəb olur.
Sakinlər üçün daha bir narahatedici məqam isə həyətdə yerləşən və hər an aşma təhlükəsi yaradan ağacdır:
“Bu ağac həm uşaqlar, həm də ümumilikdə bina sakinləri üçün təhlükə mənbəyinə çevrilib”,- deyə vətəndaşlar narahatlıqlarını bildiriblər.
Bundan əlavə, həyətin işıqlandırılmasının olmaması da axşam saatlarında çətinliklər yaradır.
"Neçə ildir aidiyyəti qurumlara bildiririk, amma gələn, maraqlanan yoxdur", – deyə narazılıq ifadə olunub.
Sakinlər ümid edirlər ki, müvafiq qurumlar məsələyə diqqət ayıracaq və minimal ehtiyacları qarşılanacaq.
