Sumqayıt şəhərinin Hacı Zeynalabdin Tağıyev qəsəbəsi ərazisində güclü leysan yağışlarından sonra ciddi infrastruktur problemi yaranıb.
Sumqayit24.az-a daxil olan məlumata görə, yağış sularının dənizə axıdılması üçün nəzərdə tutulan əsas borulardan biri partlayıb.
Nəticədə sular küçələrə axıb və ətraf əraziləri su basıb. Hətta su bəzi evlərə də dolub.
Hazırda ərazidə vəziyyət qismən nəzarət altına alınsa da, problem tam aradan qaldırılmayıb.
Sakinlərin sözlərinə görə, onlar öz imkanları hesabına partlayan borudan gələn axıntının qarşısını müvəqqəti olaraq alıblar.
Vətəndaşlar qeyd edirlər ki, ərazinin torpaq örtüyü gil olduğuna görə suyun təbii şəkildə çəkilməsi və ya quruması mümkün deyil.
Yerli sakinlər aidiyyəti qurumları vəziyyətə təcili müdaxilə etməyə, ərazidə yığılıb qalan çirkab sularının çəkilərək təmizlənməsini təmin etməyə çağırırlar.
