Sumqayıtda fəaliyyət göstərmiş hazırlıq kursundan şikayət var.
Sumqayit24.az-a daxil olan iddiaya əsasən, 8-ci mikrorayonda yerləşən "Eland" Təhsil Mərkəzi işçilərinin maaşlarını mütəmadi olaraq gecikdirib. Hazırda isə sözügedən müəssisə əməkdaşlarının maaşlarını tam şəkildə ödəmədən fəaliyyətini dayandırıb.
Mərkəzin keçmiş işçiləri - Şahanə Məsimova və Şirincan Məmmədovanın sözlərinə görə, şirkətin onlara 500 və 822 manat məbləğində borcu qalıb. Bundan əlavə, bəzi əməkdaşlara da maaşlarının verilmədiyi bildirilir.
"Kursla əlaqə saxlamağa çalışsam da, pulumu tələb etsəm də məsələnin həlli üçün heç bir addım atılmır", - deyə işçilərdən biri qeyd edib.
Qeyd edək ki, "Eland" Təhsil Mərkəzi ilə əlaqə saxlamağa çalışdıq. Kursun müdiri məsələ ilə bağlı açıqlama verməyəcəyini bildirdi.
