Sumqayıtda keçmiş məcburi köçkünlərin yaşadığı sanatoriyanın vəziyyəti olduqca acınacaqlıdır.
Sumqayit24.az-a müraciət edən sakinlərin sözlərinə görə, Səməd Vurğun küçəsində yerləşən "Metallurq" sanatoriyasının zirzəmisini kanalizasiya suları basıb.
Şikayətçilər bildirirlər ki, binada ciddi kommunal problemlər mövcuddur.
"Su boruları çürüyüb, elektrik xətləri suyun içində qalıb. Tez-tez elektrik şitləri partlayır. Mənzilləri və otaqları kəskin kanalizasiya qoxusu bürüyüb. Rütubət səbəbindən müxtəlif xəstəliklər yayılır. Havalar isindikcə vəziyyət daha da ağırlaşacaq, bunu düşünmək belə insanı narahat edir. Dəfələrlə şikayət etsək də, heç bir qurum bununla bağlı tədbir görməyib. Bundan əlavə, tez-tez işıqlar sönür, su təchizatı kəsilir", - deyə binanın sakinləri bildiriblər.
Sakinlər aidiyyəti qurumlardan əraziyə baxış keçirilməsini və problemin tezliklə aradan qaldırılmasını xahiş edirlər.
