Sumqayıtda hamilə qadının ölümü ilə nəticələnən hadisə baş verib.
Sumqayit24.az-a daxil olan məlumata görə, 30 yaşlı Saray qəsəbə sakini Ayşə Əfəndi qızı Andriaşvili Sumqayıt Təcili Tibbi Yardım Xəstəxanasına çatdırılıb. Bildirilib ki, qadın 8 aylıq hamilə olub.
Həkimlərin səylərinə baxmayaraq, onun həyatını xilas etmək mümkün olmayıb və qadın xəstəxanada dünyasını dəyişib.
Sumqayit24.az-ın sorğusuna Sumqayıt Tibb Mərkəzindən bildirilib ki, 26.02.2026-cı il tarixində saat 02:00 radələrində Sumqayıt Tibb Mərkəzinin Təcili Tibbi Yardım Xəstəxanasına 1996-cı il təvəllüdlü şəxs (qadın) hospitalizasiya olunub.
"Pasiyentə naməlum mənşəli komatoz vəziyyət, aqonal hal diaqnozları təyin edilib və zəruri tibbi yardım göstərilib. Aparılan reanimasiya tədbirlərinə baxmayaraq, onun saat 02:30 radələrində bioloji ölüm faktı qeydə alınıb.
Meyit təşrih olunması üçün Məhkəmə-Tibbi Ekspertiza və Patoloji Anatomiya Birliyinə təhvil verilib. Ölümün dəqiq səbəbləri təşrihin nəticələrindən sonra məlum olacaq", - deyə məlumatda qeyd edilib.
