Xəbər verdiyimiz kimi, Sumqayıtda "Yaşma" bağları adlanan ərazinin sakinləri mövcud kanalın Sumqayıt Bələdiyyəsi tərəfindən bağlandığını iddia ediblər.
Vətəndaşların məlumatına əsasən, bu ərazilərin sonradan müəyyən şəxslərə ödəniş müqabilində satılması kanalın istiqamətinin dəyişdirilməsinə və suyun çıxışının məhdudlaşmasına səbəb olub.
Sumqayit24.az -ın sorğusuna cavab olaraq Sumqayıt Bələdiyyəsinin mətbuat xidmətinin rəhbəri Nizami Rəsulov bildirib ki, vətəndaşların səsləndirdiyi ittihamların heç bir hüquqi əsası yoxdur və qeyd olunan məsələ ilə bələdiyyənin hər hansı əlaqəsi mövcud deyil.
Açıqlamada qeyd olunur ki, sözügedən torpaq sahələri vaxtilə müvafiq dövrdə müəssisələrə aid Bağçılıq cəmiyyətləri tərəfindən bağ sahələri üçün ayrılıb. Son 30 il ərzində isə bələdiyyə tərəfindən Yaşma bağlarında heç bir şəxsə torpaq sahəsi ayrılmayıb və ya satışı həyata keçirilməyib. Eləcədə Sumqayıt Bələdiyyəsi həmin ərazilərdə rəsmi çıxarışı olmayan şəxslər tərəfindən hər hansı hasar çəkilməsini də qəti qadağan edib.
Bununla yanaşı, kanalın bağlanması ilə bağlı məsələyə də aydınlıq gətirilib. Bildirilib ki, həmin ərazidə kanal torpaq sahibləri tərəfindən bağlanıb və bu prosesdə bələdiyyənin iştirakı olmayıb.
Ancaq buna baxmayaraq Sumqayıt Bələdiyyəsi əməkdaşları sözügedən ünvana baş çəkəcək və vətəndaşın şikayəti tam araşdırılacaq.
Sumqayıt Bələdiyyəsi bir daha vurğulayır ki, səsləndirilən iddialar əsassızdır və ictimaiyyətə yalnız rəsmi mənbələrə istinad etmələri tövsiyə olunur.
***
Sumqayıtın "Yaşma bağları" adlanan ərazisində sakinlər müxtəlif problemlərlə üzləşiblər.
Sumqayit24.az-a müraciət edən şikayətçilər iddia edirlər ki, ərazidə olan mövcud kanal Sumqayıt Bələdiyyəsi tərəfindən bağlanıb.
Vətəndaşların məlumatına əsasən, bu ərazilərin sonradan müəyyən şəxslərə ödəniş müqabilində satılması kanalın istiqamətinin dəyişdirilməsinə və suyun çıxışının məhdudlaşmasına səbəb olub.
Sakinlər qeyd edirlər ki, əvvəlki illərdə yağan güclü yağışlar zamanı belə ciddi problemlə üzləşməyiblər. Lakin bu dəfə suyun yığılması nəticəsində yağış suları axıb getməyib, borular tutulub və su geri qayıdaraq həyətlərə dolub.
Məlumata görə, subasması nəticəsində bəzi təsərrüfatlara ciddi ziyan dəyib. Fermaların bir hissəsi su altında qalıb, heyvan tələfatının da olduğu iddia edilir.
Sakinlər problemin qısa zamanda aradan qaldırılmasını və aidiyyəti qurumların məsələyə müdaxilə etməsini tələb edirlər.
Sumqayıt bələdiyyəsi ilə əlaqə saxlamağa çalışsaq da, zənglərimiz cavabsız qaldı. Sözügedən qurum mövqe bildirərsə, işıqlandırmağa hazırıq.
