Sumqayıt şəhərində "Novruzun odu və Qarabağın dirçəlişi" adlı qrup sərgisi təşkil olunub.
Sumqayit24.az xəbər verir ki, sərgidə 2 nömrəli Gənclər-İnkişaf Mərkəzinin müəllimi, rəssam Günel Aslanovanın və tələbələrinin rəsm əsərləri nümayiş olunub. Gənc rəssamların təqdim etdiyi əsərlərdə Novruz bayramının qədim ənənələri, baharın gəlişi, təbiətin oyanışı, milli-mənəvi dəyərlərimiz, eləcə də Qarabağın azad olunmasından sonra bu torpaqlarda baş verən dirçəliş və yenidənqurma prosesi bədii şəkildə göstərilib.
Tədbirin əvvəlində qonaqlar sərgi ilə tanış olub, gənc rəssamların əsərlərinə baxış keçiriblər. Daha sonra sərginin rəsmi açılış mərasimi baş tutub.
Tədbir proqramı musiqili-bədii hissə ilə davam edib. Bu hissədə Azərbaycan musiqi və rəqs sənətinin müxtəlif nümunələri təqdim olunub. İfaçılar tərəfindən Qarabağ mövzusuna və Novruz bayramına həsr olunmuş musiqi nömrələri səsləndirilib, xalq rəqsləri və muğam ifaları nümayiş etdirilib.
Tədbirin sonunda sərgidə iştirak edən gənc rəssamlara sertifikatlar təqdim olunub və onların yaradıcılıq fəaliyyəti yüksək qiymətləndirilib.
