Sumqayıt Apellyasiya Məhkəməsində dələduzluqda təqsirləndirilən Hacı Hüseynlinin (adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın məlumatına görə, hakim Elçin Məmmədovun sədrliyi ilə keçirilən prosesdə verilən qərara əsasən, təqsirləndirilən şəxsin apellyasiya şikayəti təmin edilməyib. Hacı Hüseynliyə Cinayət Məcəlləsinin 178.3.2-ci maddəsi ilə 7 il müddətə azadlıqdan məhrumetmə cəzası təyin edilib.
Təqsirləndirilən şəxs ögey bacısının məhkəmədə yüksək vəzifəli şəxslər tanıdığını və onların vasitəsilə həbsdə olanın azad ediləcəyinə dair yalan vədlər verib. Bu vədlərlə o, zərərçəkmiş şəxsin 20 oktyabr 2022-ci ildə 42 min manat, 29 oktyabr 2022-ci ildə 8 min manat, 19 dekabr 2022-ci ildə isə 30 min manat olmaqla, ümumilikdə 80 min manat pul vəsaitini ələ keçirib.
Həmçinin o, Sumqayıt şəhərində yerləşən 37 sot torpaq sahəsinin ona məxsus olması barədə həqiqətə uyğun olmayan məlumatlar verərək həmin torpaq sahəsini sənədləşdirəcəyinə dair yalan vədlərlə bir zərərçəkmiş şəxsdən 2023-cü ilin yanvar ayında 56 min manat pul alıb.
Bundan başqa, təqsirləndirilən şəxs eyni üsulla daha bir zərərçəkmiş şəxsi aldadaraq, torpaq sahəsini satacağına dair yalan vəd verib və 22 yanvar 2024-cü ildə 120 min ABŞ dolları, həmin dövrün məzənnəsi ilə 204 min manat məbləğində pul vəsaitini ələ keçirərək zərərçəkmiş şəxsə külli miqdarda maddi ziyan vurub.
Qeyd edək ki, o, Sumqayıt Ağır Cinayətlər Məhkəməsinin hökmü ilə o, 6 il müddətinə azadlıqdan məhrum edilmişdi.
