Sumqayıtda sənaye müəssisələrinin tullantı sularının təmizlənmədən Xəzərə axıdıldığı üzə çıxıb.
Bu, Milli Məclisin bu gün keçirilən iclasında müzakirəyə çıxarılan "Azərbaycan Respublikası Nazirlər Kabinetinin 2025-ci ildə fəaliyyəti haqqında hesabatı"nda əksini tapıb.
Qeyd edilib ki, Ekologiya və Təbii Sərvətlər Nazirliyinin Xəzər Ekologiya və Kompleks Ekoloji Monitorinq İdarəsi tərəfindən Sumqayıt şəhərinin Hacı Zeynalabdin qəsəbəsindən, Şirvan yaşayış massivindən dənizə axarlardan və Sumqayıt Sukanal İdarəsinin Su Təmizləyici Qurğusunun dənizə çıxışından götürülmüş su nümunəsi üzərində aparılmış kimyəvi, mikrobioloji təhlillərin nəticəsinə görə zərərli maddələrin və xəstəlik törədən bakteriyaların miqdarının yol verilən qatılıq həddindən yüksək olması faktı ilə əlaqədar inzibati protokol tərtib olunub və cərimə tətbiq edilib. Məsələ ilə bağlı Nazirliyin 4 saylı Regional Ekologiya və Təbii Sərvətlər İdarəsi tərəfindən Sumqayıt Sukanal İdarəsinə xəbərdarlıq məktubları göndərilib.
Aparılan monitorinqlər zamanı Karbamid Zavodunda formalaşan sənaye və çirkab sularının ekoloji tələblərə uyğun təmizlənmədən Sumqayıtçaya axıdılması faktı ilə bağlı Zavodun cavabdeh məsul şəxsi barəsində inzibati protokol tərtib edilib və cərimə tətbiq olunub. Həmçinin "Azərsun Kağız və Karton İstehsalatı Korporasiyası" ASC-yə məxsus müəssisədə formalaşan tullantı sularının təmizlənmədən birbaşa Sumqayıtçaya axıdılması, "Ayans Tekstil" MMC-yə, "Plastcon Group Pipe" MMC-yə, "Azpal" MMC-yə, "Texnoil" MMC-yə, həmçinin "Azercathode" MMC-yə məxsus müəssisələrdə formalaşan tullantı sularının təmizlənmədən birbaşa "Acı Dərə" kanalına axıdılması faktları ilə bağlı inzibati protokollar tərtib edilib, cərimə qərarının çıxarılması üçün materiallar Sumqayıt Şəhər Məhkəməsinə göndərilib:
"Məlumat üçün bildiririk ki, 2025-ci ildə ADSEA əsaslı vəsait qoyuluşu çərçivəsində Sumqayıt şəhəri "Acıdərə" kanalı boyunca kanalizasiya və yağış suları sisteminin yenidən qurulması işləri həyata keçirilib. Layihə çərçivəsində "Acıdərə" açıq kanalının hövzəsi boyu yerləşən fərdi yaşayış evlərindən, müəssisələrdən, sənaye obyektlərindən formalaşan tullantı sularının kanalizasiya kollektorları və toplayıcı şəbəkə vasitəsilə Sumqayıt Tullantı Su Təmizləyici Qurğularına ötürülməsi, mənsəb nöqtəsinin yaradılması ilə Yaşıl dərə yaşayış massivi və 76-cı məhəllə adlanan ərazilərdə formalaşan tullantı sularının qəbulu imkanı, tullantı sularının müvafiq normalara uyğun olaraq təmizlənərək Xəzər dənizinə axıdılması nəzərdə tutulur. Sumqayıt şəhərində çirkab su təmizləyici qurğunun tikintisi məsələsinə Dövlət İnvestisiya Proqramına daxil olan layihələrin qiymətləndirilməsini və prioritetliyinin müəyyənləşdirilməsini həyata keçirən İqtisadiyyat Nazirliyinin rəyi nəzərə alınmaqla dövlət əsaslı vəsait qoyuluşu üçün nəzərdə tutulan vəsaitin bölgüsü çərçivəsində baxılacaq".
Mənbə: Apa.az
