Xəbər verdiyimiz kimi, Sumqayıtda keçmiş məcburi köçkünlərin məskunlaşdığı binanın tavanından yaşadıqları otaqlara yağış suları dolur.
Belə ki, 2-ci mikrorayon 3 saylı məktəbin inzibati binasıda yaşayan keçmiş məcburi köçkünlərin sözlərinə görə, məsələ ilə bağlı aidiyyəti qurumlara müraciət etsələr də, məsələnin həlli istiqamətində heç bir addım atılmayıb.
Sumqayit24.az-a Qaçqınların və Məcburi Köçkünlərin İşləri Üzrə Dövlət Komitəsindən bildirildi ki, adıçəkilən ünvanda mövcud olan vəziyyətlə bağlı məlumatlıdırlar.
"Burada 26 keçmiş məcburi köçkün ailəsi müvəqqəti məskunlaşıb, bu günədək 3 ailə işğaldan azad edilmiş ərazilərdə bərpa edilmiş, yaxud yenidən qurulmuş evlərdə yaşayış sahəsi ilə təmin edilib. Yarımtikili 3 saylı məktəbin balansındadır. Binanın yarımtikili olması onun dam örtüyündə təmir işlərinin aparılmasını mümkünsüz edir. Əsaslı təmirlə bağlı isə Dövlət Komitəsinin büdcəsində vəsait nəzərdə tutulmur.
İşğaldan azad edilmiş ərazilərin bərpa-tikinti qrafikinə uyğun olaraq keçmiş məcburi köçkünlərin mərhələli qayıdışı zamanı adıçəkilən ünvanda yaşayan ailələrin də köçürülməsi təmin ediləcək", -deyə məlumatda qeyd edilib.
***
Sumqayıt şəhərində yağıntıların yaratdığı fəsadlar davam etməkdədir.
Sumqayit24.az-a daxil olan məlumata görə, yağıntı nəticəsində keçmiş məcburi köçkünlərin məskunlaşdığı 2-ci mikrorayon 3 saylı məktəbin inzibati binasıda tavandan evlərə yağış suları dolur. Nəticədə sakinlər öz mənzillərində belə rahat hərəkət edə bilmirlər.
Şikayətçilər bildiriblər ki, dəfələrlə aidiyyəti qurumlara müraciət etsələr də, məsələnin həlli istiqamətində heç bir addım atılmayıb.
Qeyd edək ki, məsələ ilə bağlı aidiyyəti qurumlara sorğu ünvanlanıb.
