Bu gün sumqayıtlı şəhidimizin doğum günüdür.
Əbil Cəbizadə 26 fevral 1993-cü ildə Sumqayıt şəhərində anadan olub.
Ailəsinin sözlərinə görə, Əbil Xocalının ildönümü günü dünyaya gəldiyinə görə, heç vaxt özünə doğum günü qeyd etməyib.
2000-ci ildə Corat qəsəbəsində yerləşən 7 nömrəli tam orta məktəbin birinci sinfinə daxil olub. 2011-ci ildə əla qiymətlərlə məktəbi bitirən Əbil həmin ildə də Azərbaycan Dövlət İqtisad Universitetinin Texnologiya və Dizayn fakültəsinə daxil olub.
Universiteti bitirdikdən sonra Əbil Cəbizadə hərbi xidmətə yollanıb. Baş atıcı vəzifəsinə təyin olunan Əbil Aprel döyüşlərində də iştirak edərək döyüş tapşırıqlarını uğurla yerinə yetirib. Bu döyüşlərdə göstərdiyi qəhrəmanlığa görə o, dəfələrlə fəxri fərmanlarla və təşəkkürnamələrlə təltif edilib. 2016-cı ilin oktyabr ayında hərbi xidmətini başa vurub.
Azərbaycan Ordusunun əsgəri olan Əbil Cəbizadə 2020-ci il sentyabrın 27-dən Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində iştirak edib. Cəbrayılın və Füzulinin azadlığı uğrunda gedən döyüşlərdə vuruşub. Xudafərin körpüsünün azad olunmasında böyük şücaət göstərib. 14 oktyabr 2020-ci ildə Xocavənd rayonunun Zoğalbulaq kəndi istiqamətində gedən döyüşlərdə şəhid olub. Sumqayıtda, Şəhidlər Xiyabanında dəfn olunub.
Prezident İlham Əliyevin Sərəncamlarına əsasən Əbil Cəbizadə ölümündən sonra "Vətən uğrunda", "Cəbrayılın azad olunmasına görə", "Füzulinin azad olunmasına görə" medalları ilə təltif edilib.
