Sumqayıt şəhərində 1972-ci il təvəllüdlü Əmir tanışı Fəridə (adlar şərtidir – red.) xəsarət yetirib.
Demokrat.az-ın məlumatına görə, hadisə Sumqayıt şəhəri, Stansiya Sumqayıt qəsəbəsi ərazisində baş verib.
Əmir qəsəbədə yerləşən tanışı Fəridin yaşadığı fərdi yaşayış evində aralarında şəxsi münasibətlər zəminində yaranmış mübahisə zamanı onun baş nahiyyəsindən yumruq zərbəsi ilə vurub. Ona müxtəlif dərəcəli xəsarətlər yetirib.
Əmirin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib. İş üzrə ifadə verən Əmir ona elan olunmuş ittiham üzrə özünü təqsirli bilib.
O, ifadəsində göstərib ki, Fəridlə uzun müddətdir dostluq münasibəti var.
"Məlum hadisə günü, təxminən saat 20:00-da yeyib-içmək üçün Fəridin yaşadığı evə getdim. Birlikdə yemək yedik və ikimiz bir şüşə (0,5 litr) araq içdik. Bir müddət sonra Fərid sərxoş vəziyyətdə mənimlə kobud zarafat etməyə başladı. Buna görə ona iradımı bildirdim. Lakin o, nalayiq ifadələrlə məni təhqir etdiyi üçün əsəbiləşərək yumruqla baş nahiyəsindən bir zərbə vurdum. Fərid başından xəsarət aldı, mən onun evindən getdim. Səhəri gün öyrəndim ki, Fərid onu döydüyüm üçün barəmdə polisə şikayət edib", - deyə təqsirləndirilən şəxs bildirib.
Məhkəmədə məlum olub ki, təqsirləndirilən şəxs zərərçəkənlə barışıq əldə edib. Bu səbəbdən də zərərçəkmiş ona qarşı şikayətini geri götürüb.
Sumqayıt Şəhər Məhkəməsinin hökmü ilə Cinayət Məcəlləsinin 73.2-ci maddəsinə əsasən təqsirləndirilən şəxsin barəsində olan cinayət təqibinə xitam verilib. O, cinayət məsuliyyətindən azad edilib.
