İtaliyada dünya çempionu olan şahmatçı Gövhər Beydullayeva Vətənə qayıdıb. Sumqayıt24 bu haqda 17 oktyabr tarixində xəbər verir.
Heydər Əliyev Beynəlxalq Aeroportunda keçən qarşılama mərasiminə şahmatsevərlər, federasiya nümayəndələri və jurnalistlər qatılıblar.
Gövhər Beydullayeva dünya çempionatındakı çıxışından danışıb:
“Rapid və blits üzrə dünya çempionatı idi. Ötən il olduğu kimi, bu il də həm qızlar, həm oğlanlar arasında qızıl medal qazanmağı bacardıq. Çox sevincliyəm ki, İtaliyada iki dəfə himnimiz səsləndi. Mənə dəstək olan hər kəsə çox təşəkkür edirəm”.
Gənc şahmatçı qarşıda çətin turnirinin gəldiyini bildirib:
“Bir həftə sonra Böyük Britaniyada “Qrand Svis” turnirində iştirak edəcəyəm. Dünyanın ən güclü qadın qrosmeysterləri orada yarışacaqlar. Əlimdən gələni edəcəyəm ki, həmin turnirdə də yüksək performans göstərim”.
