İyulun 20-si Beynəlxalq Şahmat Günü kimi qeyd olunur. Bu barədə Sumqayıt24 xəbər verir.
Sumqayıt şahmat aləminə böyük töhfə verib. Şəhərimizin yetirmələri bir çox mötəbər, beynəlxalq səviyyəli turnirlərdən qələbə ilə dönüblər. Dünya arenasında ad salmış qrosmeysterlərimizi yaxından tanıyaq:
Şəhriyar Məmmədyarov
“Şah” dünyada 20 yaşadək şahmatçılar arasında ikiqat Dünya çempionu olan yeganə kişi şahmatçıdır.
2017-ci ilin mayında 2800 Elo reytinq balını keçmiş 13-cü şahmatçı kimi tarixə keçib. O, bu uğura imza atmış ilk müsəlman idmançıdır.
Hazırda Şəhriyar FİDE reytinqində 14-cü pillədədir.
Zeynəb Məmmədyarova
Xanım şahmatçımız 18 yaşadək qızlar arasında Dünya birinciliyinin qalibi (İspaniya, 2000), 20 yaşadək qızlar arasında Avropa birinciliyinin qızıl mükafatçısı (Bakı, 2002), Ümumdünya Şahmat Olimpiadasının gümüş mükafatçısı (Sloveniya - öz taxtasında, 2002), 20 yaşadək qızlar arasında Dünya birinciliyinin bürünc mükafatçısıdır (Naxçıvan, 2003).
Z. Məmmədyarova 2009-cu ildə Sumqayıt bələdiyyəsinin üzvü, 2013-cü ilin sentyabr ayında isə qurumun sədr müavini seçilib. O, əsasən, bələdiyyənin təşkilati, mədəni-kütləvi məsələləri ilə məşğul olur.
Vasif Durarbəyli
Həmşəhərlimiz qrosmeyster titulunu 18 yaşadək oğlanlar arasında keçirilən Dünya Çempionatında qazanıb. Azərbaycanın öz sözünü demiş şahmatçılarından biri sayılır.
Hazırda Vasif ABŞ-də yaşayır.
Türkan Məmmədyarova
14 yaşadək qızlar arasında Avropa çempionatının qalibi (İspaniya, 2002), 14 yaşlı qızlar arasında dünya birinciliyində liderdən yarım xal az toplayaraq 8,5 xalla gümüş mükafatçısı (Yunanıstan, 2003), qadınlar arasında şahmat üzrə Azərbaycan çempionu olub (2011 və 2012).
Qeyd edək ki, Məmmədyarovlar ailəsi Azərbaycanda üç beynəlxalq qrosmeyster yetişdirmiş yeganə şahmatçılar ailəsidir.
Bütün şahmatçıları bu gün münasibətilə təbrik edirik!
