Sumqayıtda cüdo idman növü üzrə ustad dərsi keçiriləcək. Bu barədə 9 sentyabr tarixində Azərbaycan Cüdo Federasiyasına istinadən xəbər veririk.
“Göyərçin” parkında keçirilən tədbir sentyabrın 10-u saat 18:00-da baş tutacaq. Ustad dərsi ACF-in vitse-prezidenti, Olimpiya çempionu Elnur Məmmədli, ACF Prezidentinin müşaviri Natiq Bağırov və gənclərdən ibarət yığmanın məşqçisi Elxan Rəcəbli tərəfindən keçiriləcək. Tədbirdə yeniyetmələr arasında Dünya çempionatının gümüş mükafatçısı və Avropa çempionatının qızıl medalçısı Şahin Oruczadə (-55 kq), həmçinin Avropa çempionatının bürünc medalçısı Nicat Nağıyev (-66 kq) da iştirak edəcəklər. Bundan əlavə, yeniyetmə qızlardan ibarət milli yığmanın üzvləri Aydan Verdiyeva və Aynur Əfəndiyeva də ustad dərslərinə qatılacaqlar.
6 yaşdan yuxarı hər kəs idman geyimində tədbirdə ödənişsiz iştirak edə bilər. Bu cür layihələrin həyata keçirilməsində məqsəd gənc nəslin fiziki və mənəvi sağlamlığına töhfə vermək, idmanla məşğul olan uşaqların, gənclərin sayını artırmaqdan ibarətdir.
