“Sumqayıt”ın sabiq məşqçisi Elnur Çodarovun müraciəti əsasında Beynəlxalq İdman Arbitraj Məhkəməsi – CAS-nin araşdırması yekunlaşıb. Bu haqda 15 sentyabr tarixində Sumqayıt24 Futbolinfo.az-a istinadən məlumat verir.
Qurum məşqçinin şikayətində haqlı olduğunu, “Sumqayıt”ın ona ödəməkdən imtina etdiyi 3 aylıq maaşı bir ay ərzində çatdırması lazım gəldiyini qərarında göstərib. Bu barədə həm AFFA-ya, həm “Sumqayıt”a, həm də zərərçəkənin özünə məktub gəlib.
Sabiq məşqçiyə yaradılan problemə görə klub əlavə cərimə də ödəyəcək. Eyni zamanda AFFA müvafiq qurumun səhvi ucbatından cəriməyə məruz qalıb.
Xatırladaq ki, ötən il “Sumqayıt” futbol klubunun apellyasiya şikayəti təmin olunub. Nəticədə Oyunçuların Statusu və Transferi Komitəsinin “Klubda baş məşqçi köməkçisi vəzifəsini icra etmiş Elnur Çodarova Klub tərəfindən kompensasiya ödənilməsi” barədə martın 17-dəki qərar ləğv olunub.
Beləliklə, 2021-ci ilin dekabrında istefaya göndərilən, şikayətini ötən ilin mayında edən Çodarovun haqqı 16 ay sonra təmin edilib. “Sumqayıt” hazırda “Turan Tovuz”da işləyən məşqçinin 3 aylıq maaşını ödəyəcək, prosesdə çəkdiyi bütün xərcləri qarşılayacaq və əlavə cərimə ödəyəcək. AFFA da müvafiq qurumunun günahı üzündən sanksiyaya məruz qalacaq.
