Rafael Ağayev bəzi idmançı və məşqçilərdən narazıdır. Sumqayıt24 bu haqda 2 avqust tarixində xəbər verir.
Karate üzrə dünya və Avropa çempionu Əməkdar artist Bəhram Bağırzadə ilə canlı yayım açıb. O, buradan 3-4 nəfərin birləşib keçirdiyi yarışlarda qələbə qazanaraq özünü dünya və Avropa çempionu sayan idmançılara səslənib:
“Məndən güclü kimsə yetişə bilər. Ola bilər ki, həmin idmançı 6 dəfə dünya, 15 dəfə Avropa çempionu olsun. Amma heç kim Rafael ola bilməyəcək. Karatenin 40 növü var. Bu idmanın yalnız WKF versiyası rəsmidir. İki ildə bir dəfə dünya çempionatı keçirilir”.
Ağayevin sözlərinə görə, məşqçilər tələbələri və valideynləri aldadırlar:
“Pul yığırlar və deyirlər ki, Türkiyədə Avropa çempionatı var. Yarışda da 4 komanda iştirak edir ki, onlardan biri Qazaxıstan, digəri İrandır. Burada Avropa çempionatından söhbət gedə bilməz. Boyunlarında 18 medalla qayıdırlar. Kimsə deyir ki, oğlum 4 dəfə dünya çempionudur. 9 yaşlı idmançı necə bu uğuru qazana bilər? Hansısa məşqçini gözdən salmaq istəmirəm, amma reallıqdan danışaq. Hər zaman düz deməliyik və düzünü etməliyik. Tapşırıqla gəlib Azərbaycan çempionu olur, sonra Avropada onu kimsə tapşıra bilmir axı. Bu canlıdan sonra gərək otaqdan çıxmayım”.
