“Sumqayıt” futbol klubunun baş məşqçisi “Zirə” ilə səfər oyunundan danışıb. Sumqayıt24 bu haqda 16 sentyabr tarixində xəbər verir.
Samir Abasov bildirib ki, rəqibin azlıqda qalmağı yalnız kənardan rahat görünə bilər:
“Üstünlüyümüz var idi. Amma bundan yararlanmaq çətin idi. Rəqib 10 nəfərlə qaldığı üçün qapanır. Belə olan halda maksimum 2-3 qol vəziyyəti yaratmaq olur. İki 100%-lik epizod yaratdıq. Lakin onları qola çevirə bilmədik və nəticədə buradan xalsız dönürük. İndi düşünürəm ki, kaş rəqib azlıqda qalmazdı. "Zirə" 11 nəfərlə olsaydı, bəlkə də başqa cür oyun gedərdi. Futbolçular bacardıqlarını etdilər. Düzdür, bir az artığını etmək lazım idi. Hələ mövsümün əvvəlidir. Bu gün yeni gələn futbolçular oynayırdılar. Onlara bir az vaxt lazımdır. Ümumi olaraq pis oynamırdıq. Oyuna nəzarəti ələ keçirmişdik. Məni məyus edən məqam odur ki, ən azı bir qol vura bilərdik".
Qeyd edək ki, matç bakılıların minimal hesablı qələbəsi ilə bitib.
