“Sumqayıt”ın yeni transferi Erik Sorqa ilk təəssüratları ilə bölüşüb. Sumqayıt24 bu haqda 19 iyul tarixində xəbər verir.
Estoniyalı hücumçu bildirib ki, komandaya qoşulduqdan sonra fiziki məşqçi ilə iki gün fərdi, sonra isə komanda ilə birlikdə məşq edib:
“Tədricən isti havaya alışdım. İndi isə Türkiyədəyik, burada hər şey qaydasındadır. Komanda ilə birlikdə məşqə çıxıram və özümü əla hiss edirəm.
Kollektivdə əla atmosfer var. Maraqlı və intensiv məşqlər keçirik. Yoldaşlarım da məni yaxşı qəbul etdilər. Həm rus, həm də ingiliscə danışdığım üçün heç kimlə ünsiyyət problemim yoxdur. Bütün məsələlərdə bir-birimizə kömək edirik. Deyə bilərəm ki, adaptasiya problemim yoxdur.
Erikin sözlərinə görə, gəlməmişdən öncə Azərbaycanda oynamış dostu Sergey Zenyovla danışıb, ölkəmiz və çempionat haqqında məlumat alıb:
“Estoniyadakı kimi burada da 10 komandanın yarışdığını və liqanın 4 dövrədən ibarət olduğunu bilirdim. Haradasa çempionatlarımız arasında oxşarlıqlar var.
Azarkeşlərimizə demək istəyirəm ki, komanda olaraq hədəfimiz avrokuboklar uğrunda mübarizə aparmaqdır. Baş məşqçimizlə bu barədə tez-tez danışırıq. Məqsədimizə çatmaq üçün mən də əlimdən gələn hər şeyi edəcəyəm. Həm vurduğum qollar, həm də komanda yoldaşlarıma edəcəyim qol ötürmələri ilə çalışacağam ki, fanatlarımızı sevindirim”.
