"Sumqayıt" futbol klubunun kapitanı Elvin Bədəlov Sportal.az saytına müsahibə verib.
Sual-cavabı təqdim edirik:
- "Sumqayıt" "Turan Tovuz"la görüşdə qələbə qazanmağı bacardı. Necə alındı ki, səfərdə iddialı rəqibi məğlub etdiniz?
- Əlbəttə ki, çətin səfər olacağını yaxşı başa düşürdük. Amma bu oyuna yaxşı hazırlaşmışdıq. Rəqibi də düzgün analiz etdik. Sonda da qələbə qazanmağı bacardıq. Futbolçularımızın hamısı yaxşı mübarizə apardı. Vacib üç xalı əldə edə bildik.
- Vaqif Cavadov və futbolçular da bildirirdi ki, hazırkı vəziyyətdən çıxmaq üçün sizə bir qələbə lazımdır. "Kəpəz"i məğlub etdikdən sonra "Turan Tovuz"a da qalib gəldiniz. Demək olar ki, "qara zolaq"dan çıxdınız?
- Əlbəttə ki, uğursuz seriyaya düşəndə, komandaya yeni nəfəs üçün bir qələbə lazımdır. Onu da bacardıq. Sonradan da özgüvən artdı. Bu da "Turan Tovuz"la görüşdə bizə kömək oldu. Sevindirici hal odu ki, "qara zolaq"dan çıxa bildik.
- "Turan Tovuz"la görüşdə ilk qolun vurulmasında iştirak etdin, asistlə yadda qaldın. Həmin epizodu necə şərh edərdin?
- Yaxşı gedişatlı kombinasiya idi. Top isə məndə olanda bizim iki oyunçumuz boş zonaya yaxşı açıldı. Onlardan birinə topu çatdırmaq lazım idi. Mən də bunu etdim, bəli, yaxşı alındı.
- "Sumqayıt" bu tempi əldə etdiyi vaxtda fasilənin baş tutması sizin üçün yersiz oldu? Çünki komanda iki tur idi qalib gəlirdi...
- Əslində, istirahət bizə də lazım idi. Çünki çətin perioddan keçdik. Bu pauza bizim xeyrimizə olacaq, inanıram. Dördüncü dövrəyə yaxşı hazırlaşmaq üçün vaxtımız olacaq.
- "Sumqayıt" hazırda turnir cədvəlində 7-ci pillədədir və 28 xala malikdir. Hazırkı durumunuzdan, turnir cədvəlindəki mövqeyinizdən razısınız?
- Əlbəttə ki, bu pillə bizi qane etmir. Amma bu mövsümün reallığı budur. Bununla da barışmalıyıq. Məqsədimiz mövsümün sonuna kimi maksimum xal toplamaqdır. Necə alınacağına isə baxacağıq.
- Millidən söz düşmüşkən, Fernandu Santuşdan yığma komanda üçün dəvət gözləyirdin? Səncə, nəyə görə milliyə dəvət edilmədin?
- Hər toplanış olanda hər bir futbolçu millidən dəvət gözləyir. Mən də həmçinin. Amma yəqin ki, hazırkı performansım Fernandu Santuşu qane etmir. Ona görə də daha yaxşı olmalıyam ki, milliyə dəvət edilim.
- Necə düşünürsən, "Sumqayıt" artıq Premyer Liqadakı yerini möhkəmləndirdi? Yəni artıq yüksək liqadan düşmək təhlükə sizin üçün keçdi?
- Düzdür, sonuncu pillədəki komanda ilə xal fərqimizi bir qədər də artırdıq. Amma rahatlaşmaq olmaz. Xallar yığmaq lazımdır. Biz o vəziyyətdə deyilik ki, rahatlaşaq. Növbəti turlarda da uğurlu nəticələrimizə davam etmək istəyirik. Ümidvaram ki, hər şey yaxşı alınacaq.
- Bir də, yeni sezondan legioner limitinin ləğv edilməsi ilə bağlı mövqeyin necədir?
- Mənə görə limit yerlilərə zərər verməyəcək. Çünki bizim oyunçular futbol oynamağı bacarır. Bəlkə də bu qərar bizə daha da motivasiya olacaq. Heç bir legionerdən zəif deyilik. Qərarı verən bu suala daha yaxşı cavab verə bilər. Bizim işimiz meydanda oynamaqdır. Qərar verilib, artıq doğru və ya səhv olmasını zaman göstərəcək.
- "Qarabağ"ın səni istədiyi iddia olunurdu. Bu məsələ reallaşa bilər?
- "Qarabağ" məsələsi isə gündəmdə deyil. Mövsümün sonunda müqaviləm bitəcək. Onda transfer məsələrə qayıda bilərik.
