"Sumqayıt" FK-nın yeni transferi Ərzurum toplanışı ilə bağlı təəssüratlarını bölüşüb. Bu haqda 27 iyul tarixində Sumqayıt24 xəbər verir.
25 yaşlı pakistanlı müdafiəçi İsa Sulimanı bildirib: "Burada olmaqdan çox xoşbəxtəm. Komandada hər kəs çox qonaqpərvərdir. Toplanış boyunca məşq və matçlar zamanı biz bir-birimizin oyun tərzini daha yaxşı anlamağa çalışdıq. Bir sıra istedadlı oyunçularımız var. Ona görə də mövsümün başlamasını səbirsizliklə gözləyirəm.
Liqa və ya klub haqqında çox şey bilmirdim, amma daha çox məlumata sahib olmaq üçün düşərgədəki hər kəsə çoxlu suallar verirəm. “Sumqayıt”da çıxış etmiş futbolçulardan birini tanıyıram. O, mənə klub haqqında ancaq müsbət fikirlər söyləyib.
Oyunçularla ünsiyyət qurmaq çox asandır. Bir çox oyunçularımız ingilis dilində danışır. Artıq Azərbaycan dilində bəzi sözləri öyrənmişəm. Bir az çətin bir dil olsa da, mənim prioritetlərimdən biri meydanda istifadə etməli olduğum açar söz və ifadələri öyrənməyə çalışmaqdır.
Azarkeşlərimizə demək istəyirəm ki, mövsümün ilk oyununda mən sizi stadionda görməyi səbirsizliklə gözləyəcəyəm və biz əlimizdən gələni edəcəyik".
