Sumqayıtdan olan uşaq, yeniyetmə və gənc karateçilər texniki seminarda iştirak ediblər. Sumqayıt24 bu haqda 6 dekabr tarixində Oxu.az-a istinadən xəbər verir.
Təlim Azərbaycan Karate Federasiyaları Assosiasiyasının I vitse-prezidenti, ikiqat dünya və Avropa çempionu, SSRİ çempionu və “SSRİ idman xadimi”, “Əməkdar bədən tərbiyəsi və idman xadimi”, “Əməkdar idman ustası” fəxri adlarının və 8-ci dan qara kəmər sahibi, FHN-in İdman-sağlamlıq klubunun rəisi polkovnik Füzuli Musayevin 60 illiyinə həsr olunub.
Çıxış edən F. Musayev karatenin sirlərindən, döyüş texnikalarından, uşaq, yeniyetmə və gənclərin sağlam və vətənpərvər ruhda yetişmələrindən söhbət açıb. Daha sonra texniki seminar yubilyarın rəhbərliyi altında davam etdirilib.
Qeyd edək ki, onun hazırladığı idmançılar arasında beşqat dünya, 13 qat Avropa çempionu, Avropa və İslam oyunlarının qalibi, Olimpiya oyunlarının gümüş medalçısı, “Qara brilyant” ləqəbli Rafael Ağayev də var. [modula id="28202"]
