Sumqayıt paracüdoçuları onları Heydər Əliyev Beynəlxalq Aeroportunda qarşılayan jurnalistlərə açıqlamalar veriblər. Sumqayıt24 bu haqda 12 avqust tarixində Report.az-a istinadən xəbər verir.
Niderlandın Rotterdam şəhərində keçirilmiş Avropa Paralimpiya Çempionatında gümüş medal qazanan İlham Zəkiyev təəssüratların əla olduğunu bildirib:
"Səhər tezdən bizi qarşılamağa gəlmisiniz. Əziyyət çəkən insanlara, rəhbərliyə idmançılar və məşqçilər adından təşəkkürümü bildirirəm. Çox gözəl çıxış etdik, medalların əyarına görə komanda hesabında ikinci olduq. Gələn dəfə daha yaxşı nəticə göstərəcəyik".
Veteran idmançı bir həftədən sonra İngiltərədə başlayacaq Dünya Oyunlarında xalqı daha yüksək nəticələrlə sevindirəcəklərini vəd edib.
48 kq çəki dərəcəsində Avropa çempionu olan Şəhanə Hacıyeva da yarışın möhtəşəm keçdiyini söyləyib:
"Əməliyyatdan sonra ilk sınağım olsa da, Vətənə qızıl medalla döndüm. Ümid edirəm ki, bu nəticəni Dünya Oyunlarında da təkrarlayacağam".
Digər qızıl medalçımız Xanım Hüseynova (70 kq) qitə çempionatını yığma üçün uğurlu sayıb:
"Əsas odur ki, çempion olduq. Növbəti yarış Dünya Oyunlarıdır. Hədəfimiz isə Paris-2024 Yay Paralimpiya Oyunlarında bayrağımızı dalğalandırıb, himnimizi səsləndirməkdir".
73 kq-da Avropa ikincisi olan Namiq Abaslı da öz fikirlərini jurnalistlərlə bölüşüb:
"Avropa çempionatı yüksək səviyyədə keçirildi. Mənim çəkimdə güclü rəqiblər var idi. Yüksək səviyyədə hazırlıq keçdiyim üçün onlara qalib gələrək gümüş medal qazandım. Qarşıda Dünya Oyunları var. İnanıram ki, orada "gümüş"ü "qızıl"a çevirə biləcəyəm".
Qeyd edək ki, paracüdoçular Avropa çempionatını 7 medalla başa vurublar. Bu medallardan 5-i sumqayıtlı idmançıların payına düşüb.
