Sumqayıt Olimpiya İdman Kompleksində fudokan karate-do üzrə açıq turnir keçirilib. Sumqayıt24 bu haqda 6 noyabr tarixində xəbər verir.
Zəfər Gününə həsr edilmiş yarış Abşeron-Xızı Regional Gənclər və İdman İdarəsi, Azərbaycan Karate Federasiyası, Azərbaycan Ənənəvi Karate-do Federasiyası və Azərbaycan Fudokan Karate-do İdman Təşkilatının birgə təşkilatçılığı ilə reallaşıb.
Çıxış edən Abşeron-Xızı Regional Gənclər və İdman İdarəsinin nümayəndəsi Mail Hümbətov, Karate–do Federasiyasının baş katibi Əhməd Əfəndi, Fudokan Karate-do İdman təşkilatının rəhbəri Vüsal Abdullazadə, Baş Prokurorluğun xüsusi müsadirələr prokuroru və təşkilatın fəxri prezidenti Məmməd Əliyev, "Gənc Qazilər" ictimai birliyinin sədri Hacı Vəliyev turnirin əhəmiyyətindən danışıblar. Həmçinin yarış haqqında məlumat verib, idmançılara uğurlar arzulayıblar.
Qeyd edək ki, mübarizəyə Sumqayıt, Bakı şəhərləri, Abşeron, Biləsuvar, Qubadlı, Cəlilabad, Ağstafa və digər rayonlardan 300-ə yaxın fudokançı qatılıb.
