“UltraSumqayıt” fanklubu ilə “Sumqayıt” futbol klubu münasibətlərində bir müddət gərginlik yaşanıb.
Football-plus.az-ın məlumatına görə, azarkeş qrupu dekabrda klubun heç bir yardım etməməsindən gileylənib. Klubun “Sumqayıt”ın mətbuat xidmətinin rəhbəri Zaur Xudiyev isə məsələni belə izah edib:
“Həmişə “UltraSumqayıt” fanklubu üçün həm ev, həm də səfər oyunlarına görə bilet və nəqliyyat təşkil olunub. Biz bunu hansısa qarşılıq gözləmədən etmişik. Bunu inkar edə bilməzlər. Onlar bir neçə gün əvvəl bəyanat yayaraq bildirdilər ki, müstəqil fanklubdurlar, heç kimə tabe deyillər. Oyunlara öz hesablarına gəldiklərini dedilər. Var olsunlar, təki həmişə komandamıza dəstək versinlər. Amma bundan sonra “UltraSumqayıt”a hansısa dəstək göstərilməyəcək. Təbii ki, dedikləri kimi, öz hesablarına gəlmək istəsələr, ev oyunlarında onlar üçün sektor ayıra, həmin yerlər üçün olan biletləri yalnız onlara sata bilərik. Səfər oyunlarına da öz hesablarına gələ bilərlər.”
Azarkeş qrupunun dəfələrlə səfər oyunlarında iştirak etmədiyi gözə çarpırdı. Deyəsən, vəziyyət dəyişib. Belə ki, “Sumqayıt” “Instagram” hesabında futbolçusu Səbuhi Abdullazadənin milliyə çağrılması ilə bağlı paylaşım edib. Maraqlı məqam odur ki, həmin paylaşımın “şərh” bölməsində fanklubun rəhbəri Qüdrət Allahverdiyev “Turan Tovuz”la səfər oyununa yollanacaqlarını bildirib. Eyni zamanda, fanatlardan heç bir ödənişin tələb olunmadığını söyləyib.
Görəsən, azarkeş qrupu ilə klub arasındakı buzlar əriyibmi? Bu sualı Qüdrət bəyə ünvanladıq:
“Klubla heç vaxt problemimiz olmayıb. Şəhər və klub bizimdir və daim ona dəstəyik. Vaxt, imkan tapdıqca səfər oyunlarına yollanırıq. Ev oyunlarında isə daim komandanın yanındayıq. Hansısa narazılıqdan söhbət gedə bilməz.”
