11 il öncə bibisi oğlunu öldürən şəxsin məhkəmə prosesi yekunlaşıb. Sumqayıt24 bu haqda 6 iyul tarixində Qafqazinfo.az-a istinadən xəbər verir.
Sumqayıt Ağır Cinayətlər Məhkəməsində keçirilən prosesdə Fuad Qasımov 9 il müddətinə azadlıqdan məhrum edilib.
Hadisə 2012-ci ilin yayında baş verib. Fuad cinayəti 10 il sonra, yəni ötən il etiraf edib. Buna qədər isə onun bibisi oğlu Ceyhun Bayramovun Novxanı çimərliyində suda boğulduğu ehtimal olunub.
Cinayəti törətmiş şəxs və ya şəxslər müəyyən edilmədiyindən iş üzrə icraat 19 iyun 2014-cü il tarixli qərarla dayandırılıb.
Lakin görülən istintaq-əməliyyat tədbirləri ilə törədilmiş cinayətin üstü ötən il açılıb və Ceyhun Bayramovu dayısı oğlu Fuad Qasımovun qəsdən öldürməsi müəyyən edilib. Fuad Qasımov 2022-ci ilin fevralında Abşeron rayon prokurorluğunda dindirilib və qohumunu dənizdə çimərkən boğduğunu etiraf edib.
Cinayətə səbəb isə xoşagəlməz zarafat nəticəsində yaranan mübahisə olub.
Təqsirləndirilən şəxs məhkəmədə zarafatın məğzini xatırlamadığını bildirib. Onun sözlərinə görə, dostu və bibisi oğlu ilə birlikdə dənizə girib. Dostu az sonra sudan çıxsa da, Ceyhunla Fuad dənizdə qalıblar.
Fuad həmin vaxt sahildə aralarında olan mübahisə barədə söhbət etdikdən sonra hirslənib və hər iki əli ilə onun çiyinlərindən tutaraq suyun altına salıb. Nəticədə suyun altında çırpınan Ceyhun boğularaq ölüb.
Fuad içkili olduğunu, həmin vaxt zarafatın ona pis təsir etdiyini və buna görə özünü itirdiyini söyləyib.
Cinayətdən sonra Fuad dənizin dərin hissəsinə gedərək səs-küy qoparıb və bibisi oğlunun suda batdığını deyib. Onun səsinə sahildə xidmət edən FHN-in xilasedicisi yaxınlaşıb. 10 dəqiqə sonra isə Ceyhunun cansız bədəni sudan çıxarılıb.
Fuad Qasımov 10 ildən artıq vaxt keçməsinə baxmayaraq, vicdan əzabı çəkdiyini, etirafı da buna görə etdiyini bildirib.
