Sumqayıtda sərxoş vəziyyətdə avtomobil qaçıran şəxsə hökm oxunub. Sumqayıt24 bu haqda 9 yanvar tarixində Pravda.az-a istinadən xəbər verir.
Məhkəmə iclasında 24 yaşlı Elman Qədirov özünü təqsirli bilib. O, ifadəsində deyib ki, hadisə günü “Bəyaz” şadlıq sarayında qardaşı ilə birlikdə toyda olub və spirtli içki qəbul edib. Təxminən saat 23:00 radələrində onlar toydan çıxıblar. Novxanı bağlar massivinə çatan zaman isə DYP əməkdaşları qardaşının maşınını saxlayıblar. Sükan arxasında içkili qardaşı əyləşdiyi üçün maşını cərimə meydançasına aparıblar. Bir az keçdikdən sonra Elman da cərimə meydançasına gedib. Lakin orada qardaşını tapa bilməyib.
Elman Qədirov saat 02:00 radələrində sərxoş ikən evə qayıtmaq istəyəndə İnşaatçılar qəsəbəsi ərazisində, 36 nömrəli evin önündə qara VAZ-2107 markalı avtomobili görüb. Açar maşının üstündə olduğu üçün mühərriki işə salıb və Novxanı bağlar massivi ərazisinə gedib. Gecə isə avtomobilin içində yatıb. Oyandıqdan sonra isə nəqliyyat vasitəsini bağların arasında saxlayıb, evə gedib.
Onun sözlərinə görə, özünə gəldikdən sonra maşını sahibinə necə qaytara biləcəyi barədə düşünüb. Sonra günorta saatlarında maşını Sumqayıt Şəhər Polis İdarəsinə təhvil verib. Baş vermiş hadisə barədə danışıb və əməlindən peşman olduğunu bildirib.
Sumqayıt Şəhər Məhkəməsində hakim Fikrət Əliyevin sədrliyi ilə keçirilən prosesdə o, altı ay müddətinə azadlığın məhdudlaşdırılması (elektron qolbaq) cəzasına məhkum edilib.
