Sumqayıt Ağır Cinayətlər Məhkəməsində Azərbaycan dövlət sərhədini pozan ermənilərə hökm oxunub. Sumqayıt24 bu haqda 7 iyul tarixində Report.az-a istinadən xəbər verir.
Hərbi qulluqçular - Arutyun Ovagimyan və Karen Kazaryanın cinayət işi üzrə növbəti məhkəmə iclası keçirilib. Hakim Fəhmin Hümbətovun sədrliyi ilə keçirilən prosesdə onların vəkilləri müdafiə çıxışları ediblər və erməni hərbçilər son söz deyiblər.
Məhkəmənin qərarı ilə onların hər biri 11 il 6 ay müddətinə azadlıqdan məhrum edilib.
Xatırladaq ki, Ermənistan vətəndaşları A. Ovagimyan və K. Kazaryan qeyriləri ilə qabaqcadan əlbir olan bir qrup şəxs halında mayın 26-da Azərbaycanın mühafizə olunan dövlət sərhədini qanunsuz əldə etdikləri odlu silah və döyüş sursatları ilə hərbçilərimizə qarşı zor tətbiq etməklə qanunsuz keçiblər. Onlar odlu silah və döyüş sursatlarını qabaqcadan əlbir olan bir qrup şəxs halında qaçaqmalçılıq yolu ilə Zəngilan rayonunun Rəzdərə kəndinə keçirməklə ölkəmizdə terror aktı törədəcəkləri ilə hədələmələri, bu məqsədlə Rəzdərə kəndi ərazisində yerləşən və dövlət sərhədini mühafizə edən Azərbaycan hərbi qulluqçularına atəş açaraq hücum etmələrinə əsaslı şübhələr müəyyən edilib.
İstintaqla, həmçinin müəyyən edilib ki, ordumuzun hərbi qulluqçuları tərəfindən hücumların qarşısı qətiyyətlə alınıb. Qaçmağa çalışan erməni diversiya qrupunun adları qeyd olunan üzvləri saxlanılan zaman Arutyundan cinayətin aləti olan 1 ədəd “Kalaşnikov” markalı AKM modelli odlu silah və içərisində 10 ədəd 5,45 mm kalibrli döyüş patronları olan 1 ədəd daraq götürülüb.
Saxlanılan ermənilərə Cinayət Məcəlləsinin bir neçə maddəsi ilə yekun ittihamlar elan edilib.
