Sumqayıtda xəstəxanaya müraciət edən və köçürülən sistemdən sonra uşaqda ciddi fəsad yarandığı iddia olunur.
Sumqayit24.az redaksiyasına müraciət edən şəhər sakini Elşən Kərimov bildirib ki, 15 noyabr 2025-ci il tarixində 2023-cü il təvəllüdlü qızı Gülşən Sumqayıt şəhər Uşaq Xəstəxanasının Yoluxucu Xəstəliklər korpusunda müalicə alarkən ayağına sistem (damardaxili məhlul) köçürülüb.
Iddiaya görə, sözügedən tibbi müdaxilədən sonra azyaşlının ayağında və sümüyündə şişkinlik yaranıb. Hadisədən sonra dəfələrlə adıçəkilən tibb müəssisəsinə müraciət edilsə də, məsələ ilə bağlı konkret tibbi izahat verilməyib, məsuliyyət heç kim tərəfindən üzərinə götürülməyib və problemin həlli istiqamətində real addımlar atılmayıb.
Hazırda uşağın güclü ağrılar səbəbindən yeriyə bilmədiyi, gecələr yata bilmədiyi və vəziyyətinin valideynləri ciddi şəkildə narahat etdiyi qeyd olunur.
Məsələ ilə bağlı TƏBİB-ə sorğu ünvanlanıb. Qarşı tərəfin mövqeyini aldıqdan sonra xəbəri yeniləyəcəyik.
