Vətəndaşlar 2 saylı Sumqayıt şəhər xəstəxanasında verdikləri analizlərin cavablarını çətinliklə alırlar. Sumqayıt24 bu haqda 20 fevral tarixində Sumqayit.tv-yə istinadən xəbər verir.
Tibb ocağında çap qurğusu yoxdur. Xəstələr analizlərin cavabını almaq üçün digər xəstəxana və ya poliklinikaya getməlidirlər. Getdikləri ünvanda əlindəki çeki göstərməli, analizin cavabını istəməlidirlər. Bundan sonra xəstə analizi götürüb, yenidən 2 saylı xəstəxanaya qayıtmalıdır ki, həkim nəticələrə baxıb qərar versin.
Xatırladaq ki, 2 saylı xəstəxana Sumqayıt şəhərindən xeyli aralıda yerləşir. Onun binası yeni inşa olunub. Səhiyyə Nazirliyinə xəstəxananın tikilməsi və zəruri avadanlıqların alınması üçünə dövlət büdcəsindən 5 milyon manat vəsait ayrılıb.
TƏBİB-dən bildirilib ki, məsələ araşdırıldıqdan sonra məlumat veriləcək.
