Elektrik sürət qatarlarının hərəkət cədvəlləri dəyişiləcək. Sumqayıt24 bu haqda 12 sentyabr tarixində “Azərbaycan Dəmir Yolları”na istinadən xəbər verir.
Sərnişinlər 8 sentyabr tarixində tətbiq edilmiş yeni qrafikdən narazılıqlarını bildirmişdilər. Buna görə Sumqayıt-Pirşağı-Bakı xəttində saat 07:50 reysi sentyabrın 15-dən etibarən bərpa ediləcək. Sözügedən qatarın bərpası ilə əlaqədar qrafikdə bir sıra dəyişikliklər olunub.
Yeni qrafikə əsasən, Sumqayıtdan saat 06:35-də, Bakıdan isə saat 07:30-da Xırdalan istiqamətində, Sumqayıtdan saat 08:15-də Pirşağı istiqamətində yola düşən reyslər ləğv edilib. Əvəzinə Sumqayıtdan saat 07:50-də Pirşağı istiqaməti ilə yola düşən qatar qaytarılıb.
Ləğv edilən reyslərlə bağlı bildirilir ki, Sumqayıtdan saat 06:35-də yola düşən və Xırdalan istiqamətində hərəkət edən qatarın sərnişinləri alternativ olaraq saat 06:20 və 06:45-də yola düşən qatarlardan istifadə edə bilərlər.
Bakıdan saat 07:30-da yola düşən və Xırdalan istiqamətində hərəkət edən qatardan istifadə edən sərnişinlər isə alternativ olaraq 07:20-də yola düşən qatarlarla səfərlərini həyata keçirə biləcəklər.
