Sumqayıtda dövlət tərəfindən pulsuz şəkildə təşkil olunan ingilis dili kursu fəaliyyətini natamam dayandırıb. Bu haqda 31 yanvar tarixində Sumqayıt24 xəbər verir.
Söhbət Dövlət Məşğulluq Agentliyi tərəfindən keçirilən 6 aylıq (2 oktyabr 2023 – 29 mart 2024) PROGRO adlı kursdan gedir. Kurs tələbələrinin sözlərinə görə, dərslər 3 aydan sonra fəaliyyətini yarımçıq dayandırıb.
“Vəd vermişdilər ki, ödənişsiz ingilis dili kursu keçib, sonda sertifikat verəcəklər. Amma bizi aldatdılar. Müəyyən bürokratik prosedur məsələləri ilə bağlı qeyri-müəyyən müddətə dayandırıldığını deyiblər. Sonuncu dərs dekabr ayında keçirilib. 1 aydan çoxdur ki, dərslər tədris olunmur. “Bərpa ediləcək” deyib yola verirlər. Kursda ümumilikdə təxminən 30-40 tələbə təhsil alırdı. Biz işdən çıxıb bu kursa başlamışdıq ki, ingilis dilini öyrənək. Bilsəydik, işləyib pulumuzu qazanardıq”, – deyə zərərçəkmişlər bildiriblər.
Qeyd edək ki, layihəni Birləşmiş Millətlər Təşkilatının İnkişaf Proqramı və ABŞ Beynəlxalq İnkişaf Agentliyi maliyyələşdirir.
