27 sentyabr 2020-ci ildə Ermənistan silahlı qüvvələri bir neçə istiqamətdən Azərbaycanın yaşayış məntəqələrini və hərbi mövqelərini atəşə tutub. Buna cavab olaraq, “Dəmir yumruq” adlı əks-hücum əməliyyatı başlayıb, ölkədə hərbi vəziyyət elan olunub və 28 sentyabr Azərbaycanda qismən səfərbərlik elan edilib.
Azərbaycan Ordusu müharibənin ilk günündən bir neçə rayonu və strateji əhəmiyyətli əraziləri işğaldan azad etmişdir. Cəbrayıl 4 oktyabr, Füzuli 17 oktyabr, Zəngilan 20 oktyabr, Qubadlı 25 oktyabr, Şuşa isə 8 noyabr tarixlərində işğaldan azad olunmuşdur. İkinci Qarabağ müharibəsində şəhid olmuş hərbi qulluqçuların sayı 2908, itkin düşmüşlərin sayı isə 6-ya çatmışdır.
Azərbaycan Respublikası Baş Prokurorluğunun verdiyi məlumata görə, 2020-ci il sentyabrın 27-dən noyabrın 10-dək Ermənistan silahlı qüvvələri 547 dinc sakinə zərər vurmuşdur. Onlardan 93 nəfər həlak olmuş, 454 nəfər isə yaralanmışdır.
Azərbaycan Respublikası Prezidenti İlham Əliyevin 2 dekabr 2020-ci ildə imzaladığı Sərəncama əsasən, hər il sentyabrın 27-si ölkədə Anım Günü kimi qeyd olunur.
Bu il sentyabrın 19-da səhər saat 4 radələrində Əhmədbəyli-Füzuli-Şuşa avtomobil yolunun 58-ci kilometrliyində yük maşını tank əleyhinə minaya düşüb. Nəticədə 2 nəfər - 53 yaşlı Sadıxov Samir və 58 yaşlı Quliyev Fərhad həlak olublar. Hadisənin ardınca elə həmin ərazidə növbəti mina partlayışında 4 polis əməkdaşımız həlak olub. Bu hadisələr “terror aktı” adlandırılıb və Azərbaycan tərəfindən lokal xarakterli antiterror əməliyyatına başlanıb.
