Məhəmməd Əmin Rəsulzadə 31 yanvar 1884-cü ildə Bakının Novxanı kəndində anadan olub.
28 may 1918-ci ildə Məhəmməd Əmin Rəsulzadənin sədr olduğu Azərbaycan Milli Şurası Azərbaycanın istiqlalını elan edir və altı maddədən ibarət olan Azərbaycan İstiqlal Bəyannaməsi qəbul edilir. Lakin o, 27 aprel 1920-ci ildə, AXC-nin süqutundan sonra həbs edilib. Daha sonra Rəsulzadə Stalinin göstərişi ilə həbsdən azad olunub, Moskvaya aparılıb, Rusiya Sovet Federativ Sosialist Respublikasının Milli İşlər Komissarlığında çalışıb. 1922-ci ildə o, elmi ezamiyyət adı ilə Sankt-Peterburqa gedir, oradan isə Finlandiyaya keçir.
Rəsulzadə müxtəlif xarici ölkələrə getməyə məcbur olan azərbaycanlıların istiqlal mübarizəsini vahid mərkəzdən idarə etmək məqsədilə İstanbulda Azərbaycan Milli Mərkəzini - “Müsavat” Partiyasının Xarici Bürosunu yaradıb. O, “Müsavat”ın Azərbaycanda fəaliyyət göstərən gizli təşkilatına istiqamət verib. 1926-cı ildə Rəsulzadənin iştirakı ilə Parisdə sovet rejiminə qarşı müxtəlif xalqların nümayəndələrinin vahid mübarizə bloku - “Prometey” adlı təşkilat yaradıldı. 1949-cu ildə isə Rəsulzadə Ankarada “Azərbaycan Kültür Dərnəyi” təsis etdi.
Məhəmməd Əmin Rəsulzadə 6 mart 1955-ci ildə Türkiyənin Ankara şəhərində vəfat edib. O, oradakı Cəbəci Əsri qəbiristanlığında dəfn olunub.
Azərbaycan Respublikasının Prezidenti İlham Əliyev 2024-cü ildə Rəsulzadənin 140-illiyini qeyd edilməsi haqqında Sərəncam imzalayıb.
