Bu gün Vətən müharibəsi şəhidi Rahib Babayevin mövlud günüdür.
Azərbaycan Ordusunun mayoru olan Rahib Bəxtiyar oğlu Babayev 1985-ci ildə Şahbuz rayonunun Külüs kəndində anadan olub.
Rahib orta məktəbi bitirdikdən sonra C. Naxçıvanski adına hərbi liseydə, daha sonra Heydər Əliyev adına Azərbaycan Ali Hərbi Məktəbində təhsil alıb. İlk iş yeri H.Z. Tağıyev qəsəbəsindəki “N” saylı hərbi hissə, ilk komandiri isə Polad Həşimov olub.
Babayev Vətən müharibəsi zamanı Murovdağ istiqamətində gedən döyüşlərdə şücaət göstərib. Döyüşlər zamanı qolundan ağır yaralanan Rahib döyüş meydanını tərk etməyib. Yaralı halda vuruşaraq, yaralanmış əsgərlərinin həyatlarını xilas edib. Düşmənin xeyli hərbi texnikasını və canlı qüvvəsini məhv edib. İkinci dəfə yaralanandan sonra isə şəhadətə yüksəlib. Oktyabrın 2-də Sumqayıtın Şəhidlər xiyabanında dəfn olunub.
Ölümündən sonra “Azərbaycan Bayrağı” ordeni, “Vətən uğrunda” və “Kəlbəcərin azad olunmasına görə” medalları ilə təltif edilib.
