Bu gün qəhrəman şəhidimiz Rəhimli Orxanın doğum günüdür.
Əslən Qubadlı rayonunun Qiyaslı kəndindən olan Orxan Rəhimli 1992-ci il 20 iyun tarixində Sumqayıt şəhərində anadan olub. 2008-ci ildə H. Z. Tağıyev qəsəbəsində yerləşən F. Cəfərov adına məktəbi bitirib.
Cəlilabad şəhərində yerləşən N saylı hərbi hissədə xidmətdə olub. Hərbi xidməti başa vurduqdan sonra Quba Texniki Kollecində Yol hərəkətinin təşkili ixtisası üzrə təhsil alıb. 2014-cü ildən N saylı hərbi hissədə müddətdən artıq həqiqi hərbi xidmət (MAXE) vəzifəsində çalışıb.
Vətən müharibəsində Füzuli, Cəbrayıl, Hadrut, Zəngilan, Qubadlı, Kəlbəcər və Laçının azad olunmasında iştirak edib.
28 iyun 2021-ci il tarixində Laçın rayonu ərazisində “KamAZ” markalı hərbi yük avtomobilinin qəzaya uğraması nəticəsində Azərbaycan Ordusunun müddətdən artıq həqiqi hərbi xidmət hərbi qulluqçusu Orxan Rəhimli şəhid olub. Sumqayıtın Şəhidlər xiyabanında dəfn olunub.
Azərbaycan Respublikası Prezidentinin müvafiq Sərəncamına əsasən, "Laçının azad olunmasına görə" və "Füzulinin azad olunmasına görə" medalları ilə təltif olunub.
