Sumqayıtda polislə insident yaşayan Zaur Darabzadə haqqında qərara xitam verilib. Bu barədə 17 iyun tarixində Sumqayıt24 xəbər verir.
Bununla bağlı o, özü açıqlama yayıb:
“Yəqin ki, mətbuatda mənimlə polis arasında insident olduğu məzmunlu xəbərlərlə rastlaşmısınız. Bu barədə çox soruşanlar olsa da, heç kimə hər hansı bir açıqlama verməmişdim. Öncəliklə qeyd edim ki, mən heç bir qanun pozuntusuna yol verməmişəm, həmin gün üçün xüsusi icazə tələb edilən əraziyə keçməyi nəzərdə tutan müvafiq buraxılış vərəqəm var idi. Baş vermiş hadisə ilə bağlı Sumqayıt şəhər məhkəməsi və Sumqayıt Apellyasiya məhkəməsi xeyrimə qərar çıxardı və qanun pozuntusuna yol vermədiyim sübut edildiyi üçün inzibati xəta üzrə icraata xitam verildi. Bu minvalla ədalətli qərar üçün Sumqayıt şəhər və Sumqayıt Apellyasiya Məhkəmələrinin hakimlərinə, xüsusilə vəkilim İsrafil Əliliyə dərin təşəkkürümü bildirirəm.
Kiçik bir anlaşılmazlıq oldu və bu məsələdə bəzi şəxslər, təəssüf ki, həqiqətə uyğun olmayan məlumatlar yaymaqla bərabər, məni də təxribata çəkmək istədilər. Lakin istədiklərinə nail olmadılar. Çünki mən dövlətimizi çox sevir və məsuliyyətli bir vətəndaş olaraq qanunlarımıza hörmətlə yanaşıram.
Hər bir Azərbaycan vətəndaşı kimi, mən də hüquq-mühafizə orqanlarımızla və bununla yanaşı, polis əməkdaşlarımızla qürur duyuram. Məhz onların əvəzsiz və fədakar fəaliyyətinə görə sabit və təhlükəsiz ölkədə yaşayırıq. Allah Azərbaycanımızı qorusun!”
Qeyd edək ki, Zaur Darabzadə “CinemaPlus” kinoteatrlar şəbəkəsinin rəhbəridir. O, aprel ayında “Sumqayıt” – “Neftçi” matçını izləmək üçün şəhərimizə gəlmişdi. Stadionun həyətinə daxil olan zaman polis əməkdaşları onu saxlayıblar, buraxılış vərəqəsi olmadığına görə maşını ərazidən çıxarmasını tələb ediblər. Z. Darabzadə isə maşını geri çəkməyəcəyini bildirib və tərəflər arasında mübahisə yaşanıb. İş adamı polis bölməsinə aparılıb, barəsində inzibati protokol tərtib olunub.
