Sərnişinlər ekspres avtobuslarında problemlə rastlaşdıqlarını bildirirlər. Sumqayıt24 bu haqda 24 yanvar tarixində Teleqraf.com-a istinadən xəbər verir.
Sumqayıt-Bakı avtobuslarının rəsmi intervalı 11 dəqiqədir. Ancaq iddiaya görə, sürücülər oturacaqları dolmamış yola çıxmırlar. Həmçinin səhər saatlarında validatorların işləmədiyi deyilir. Nəticədə sərnişinlər növbədə dayanan digər avtobuslara yönləndirilirlər.
Azərbaycan Yerüstü Nəqliyyat Agentliyinin (AYNA) mətbuat katibi Tural Orucov “Teleqraf”a iddiaları təkzib edib. O bildirib ki, Sumqayıt-Bakı ekspres xəttində 14 avtobus 11 dəqiqə intervalla sərnişinlərə xidmət göstərir:
“Sürətli sərnişindaşımanı təmin edən ekspres avtobuslar müntəzəm reyslərə aiddir və qrafik üzrə hərəkət edir”.
Tural Orucov onu da qeyd edib ki, reysdən öncə bütün oxuma cihazlarının yoxlanışı həyata keçirilir:
“Validatorlarda problem yarandığı təqdirdə isə nasazlıq tez bir zamanda aradan qaldırıla bilər və ya sərnişinlər növbəti ekspres avtobusla yola salına bilərlər”.
