Sumqayıtda dünyaya gələn Ellada Həsənova dekorativ tətbiqi sənət və rəssamlıq yaradıcılığı ilə məşğul olur. Sumqayıt24 bu haqda 7 fevral tarixində Azərtac-a istinadən xəbər verir.
O, incəsənətə uşaqlıqdan həvəs göstərib. Bu maraq onu Azərbaycan Dövlət Pedaqoji Universitetinə gətirib. E. Həsənova Bədii qrafika fakültəsini bitirib, bir sıra dövlət qurumlarında çalışıb, hazırda isə Sumqayıt Dövlət Rəsm Qalereyasının rəhbəridir.
Həsənova incəsənətin sirlərini tanınmış heykəltaraş, Əməkdar incəsənət xadimi, professor İbrahim Zeynalovdan mənimsəyib. Sonra isə bilik və təcrübəsini, əməyini gənc rəssamların üzə çıxarılmasına, yeni layihələrin reallaşdırılmasına sərf edib.
O, verdiyi müsahibədə bildirib ki, işlədiyi yerdən, tutduğu vəzifədən asılı olmayaraq, boş vaxtını yaradıcılığa həsr edir, ailəsi ilə birlikdə ölkəmizin füsunkar təbiətini qarış-qarış gəzir.
Azərbaycan Rəssamlar İttifaqının üzvü olan xanım təsviri incəsənətin dekorativ tətbiqi sənət və boyakarlıq növü ilə məşğul olur, əsərlərində milli-mənəvi dəyərlərin və adət-ənənələrimizin təbliğinə önəm verir. Onun yaratdığı rəngarəng, milli-dekorativ xarakterli təsvirlər, klassik tonlarda, ovqatda təqdim etdiyi kompozisiyalar, süjetli əsərlər milli kolorit baxımından diqqəti cəlb edir.
Ellada Həsənovanın əsərləri müxtəlif beynəlxalq sərgilərdə nümayiş etdirilib və böyük maraq doğurub. “Muğam kompozisiyası” adlı əsəri Sankt-Peterburqda Azərbaycan Respublikasının Müstəqilliyinin bərpasının 20-ci ildönümünə həsr olunmuş sərgidə uğurla iştirak edib. Hazırda həmin əsər Rusiya Etnoqrafiya Muzeyində qorunub saxlanılır.
“Rəssam bir əsər yaratmaq üçün ruhunu, hisslərini, arzularını, ən önəmlisi də zamanını sevə-sevə həmin işə sərf etməlidir. Əl işlərimi fərqli bədii ifadə tərzi, xüsusi harmonik ab-hava ilə daha da zənginləşdirməyə çalışıram. Əl işlərimi qonaqlar suvenir kimi ölkələrinə aparanda ürəyim fərəhlə dolur ki, xaricdə Azərbaycan, onun mədəniyyəti, millətimiz haqqında müsbət fikir formalaşacaq”, – deyə o əlavə edib.
Rəssamlıq və dekorativ tətbiqi sənətlə peşəkar səviyyədə məşğul olan Ellada Həsənova 2018-ci ildən həm də ABAD ilə (Ailə Biznesinə Asan Dəstək) əməkdaşlıq edir.
