FHN-in Sumqayıt Regional Mərkəzi Xüsusi Riskli Xilasetmə Xidməti ilə birgə taktiki-xüsusi təlim keçirib. Bu haqda 20 iyun tarixində Fövqəladə Hallar Nazirliyinə (FHN) istinadən məlumat veririk.
“Fövqəladə hal rayonuna qüvvə və vasitələrin cəlb olunmasının təşkili” mövzusunda keçirilən seminar Xızı rayonu, Altıağac qəsəbəsində təşkil olunub.
Təlim iki mərhələdən – “Şəxsi heyətin yüksək hazırlıq dərəcəsinə gətirilməsi, hadisə rayonuna yürüşü və toplanma rayonunda yerləşdirilməsi” və “Baş vermiş fövqəladə hadisənin nəticələrinin aradan qaldırılması”ndan ibarət olub.
Buraya FHN-in Sumqayıt Regional Mərkəzi, Xüsusi Riskli Xilasetmə Xidməti, Xızı Rayon Yanğından Mühafizə Hissəsi, Mərkəzi rayon Xəstəxanası PHŞ-nin, rayon Polis Şöbəsinin və Altıağac Milli Parkının ümumilikdə 60 nəfər canlı qüvvəsi və 16 ədəd nəqliyyat vasitəsi cəlb olunub.
Taktiki təlim zamanı şərti uçqun baş vermiş ərazidə axtarış-xilasetmə işlərinin aparılması, meşə yanğınının söndürülməsi, subasma zonasından suyun çəkilməsi, kanatda köməksiz vəziyyətdə qalmış vətəndaşların xilas edilməsi və ilkin tibbi yardımın göstərilməsi kimi əməliyyatlar uğurla icra olunub.
