İnternat tipli gimnaziyanın müəllim və şagird kollektivi şəhid Səbuhi Həsənquliyevin ailəsini ziyarət edib. Sumqayıt24 bu haqda 24 oktyabr tarixində Den.az-a istinadən xəbər verir.
Kollektiv şəhidin anası Mayisə Həsənquliyeva ilə görüşüb, Səbuhinin döyüş yoluna nəzər salınıb. Mayisə xanım qonaqlara özünün yazdığı "Şəhidlik Tanrı Hədiyyəsidir" adlı kitabını hədiyyə edib.
Bildirilib ki, Səbuhi Həsənquliyev 44 günlük Vətən müharibəsində iştirak edib. O, Şuşa uğrunda aparılan son döyüşünə sanki toya gedirmiş kimi qoluna qırmızı parça bağlayaraq: "Vətən uğrunda qurban gedirəm", – deyərək yollanıb. Qəhrəmanımız çoxlu sayda düşmən məhv etdikdən sonra ürəyindən vurulub.
Məlumata əsasən, müharibə başlayanda Həsənquliyev 5 ayın əsgəri idi. Cüssəsinə və ayıq-sayıqlığına görə o, XTQ-yə cəlb olunmuşdu. Bundan sonra Səbuhi "yaşma"larla birgə ən öndə getməyə başlayır.
Şəhidimiz yaralı, ya da şəhid olmuş dostunu döyüş meydanından çıxarmağa çalışarkən düşmən gülləsinə tuş gəlib. Silahdaşları ona çatanda çiynindən, yaxın məsafədən ürəyindən və boğazından vurulan Səbuhi artıq şəhadətə ucalmışdı.
Ali Baş Komandan İlham Əliyevin Sərəncamı ilə Səbuhi Həsənquliyev ölümündən sonra "Vətən uğrunda", "Füzulinin azad olunmasına görə", "Cəbrayılın azad olunmasına görə", "Qubadlının azad olunmasına görə" və "Şuşanın azad olunmasına görə" medallarına layiq görülüb.
Səbuhi Sumqayıt şəhər Şəhidlər xiyabanında torpağa tapşırılıb. Adının yaşaması üçün doğulduğu Ucar rayonu Boyat kəndinin girişində şərəfinə lövhə ucaldılıb, adına şeir həsr edilib.
