Bu gün Azərbaycan ədəbiyyatının görkəmli nümayəndəsi Mikayıl Müşfiqin anım günüdür.
Sumqayit24.az xəbər verir ki, M.Müşfiq azad fikirləri, arzularına görə Stalin repressiyasının qurbanı olub. Onun "Yenə o bağ olaydı", “Oxu, tar" və bir sıra şeirləri Azərbaycan poeziya xəzinəsinin inciləri sırasındadır.
İstedadlı şair qısa bir ömür yaşamasına baxmayaraq Azərbaycan poeziyasının inkişafında, onun yeni mövzu, bəşəri məzmunla zənginləşməsində böyük rol oynayıb.
Mikayıl Əbdülqadir oğlu İsmayılzadə 5 iyun 1908-ci ildə Bakının Dağlı məhəlləsində, ziyalı ailəsində dünyaya gəlib. Çox gənc yaşlarından bədii yaradıcılığa başlayan Mikayılın ilk şeiri 1926-cı ildə çap olunub.
Qısa müddətli yaradıcılıq dövründə şairin 10 şeirlər kitabı çap olunub. M.Müşfiq qələmindən çıxmış bütün lirik şeirlər və poemalar yetkin sənət nümunələri olub, Azərbaycan poeziyasını zənginləşdirən bədii əsərlərdir. Müasirlik, coşqun hisslər, yüksək ilham və həyat sevgisi bu əsərlərin əsas səciyyəsi, onları dəyərləndirən əlamətlərdir. M.Müşfiq maraqlı və orijinal əsərləri ilə ədəbiyyatımızda dərin izlər qoyub.
Sovet imperiyasının repressiya qurbanı olmuş Mikayıl Müşfiq 1938-ci il yanvarın 6-da amansızlıqla güllələnib. 1956-cı il mayın 23-də isə SSRİ Ali Məhkəməsinin Hərbi kollegiyasının qərarına əsasən ölümündən sonra bəraət alıb.
