Məhkum sabiq məhkəmə hakimi hökmdən narazı qalıb. Sumqayıt24 bu haqda 26 yanvar tarixində Qaynarinfo.az-a istinadən xəbər verir.
Rüşvət müqabilində qanunsuz qərardad çıxardığına görə tutulan İlyas Mahmudov bəraət tələbi ilə apellyasiya şikayəti verib. Müttəhimin istintaq təcridxanasında yazdığı şikayətə Sumqayıt Apellyasiya Məhkəməsində baxılacaq.
Qeyd edək ki, Mahmudov 2008-2019-cu illərdə Sumqayıt Şəhər Məhkəməsinin hakimi işləyib. 2022-ci ildə Korrupsiyaya qarşı Mübarizə Baş İdarəsi tərəfindən həbs edilib. Ona qarşı Cinayət Məcəlləsinin 295.1 (bilə-bilə ədalətsiz hökm, qətnamə, qərardad və ya qərardad çıxarma), 308.2 (ağır nəticələrə səbəb olan vəzifə səlahiyyətlərindən sui-istifadə), 311.3.2 (təkrar rüşvət alma) və 313-cü (vəzifə saxtakarlığı) maddələri ilə ittiham irəli sürülüb.
Sumqayıt Ağır Cinayətlər Məhkəməsinin hökmü ilə İ. Mahmudov təqsirli bilinərək 9 il müddətinə həbs olunub.
